Primeiro día de vendima
O sábado tocou vendimar tintas e estivemos en Correlos, Reghengo, Louriña e As Insuas. Este ano había menos uva e nos cachos a metade estaba seco. Vendimamos Gharnacha, Folla Redonda e Mencía. A Folla Redonda é un híbrido que dá un viño oscuro e de aí sacan muito Barrantes. As uvas son redondas e de cor mui escura e a folla da videira dobra as puntas dunha maneira que case queda redonda. De Mencía non hai muitas videiras pero son mui vellas, gordas e retortas. Á beira das Insuas había un cabalo cun cencerro que o deixan alí de noite para que non vaia o porco bravo ó millo. Tamén deixan un can na outra punta da veiga pero o porco bravo entra todo cheo de razón. Supoño que ó ver que hai máis animais el colle confianza.O domingo chegou a treboada e fixen a foto de arriba dende a fiestra da casa
Aparte de vendimar aprendín dunha prantiña sinxela que nace no medio das viñas e que se chama beldro e sae refrexada na foto de embaixo. Antigamente facían ensalada co ela pero non valía muito. Eu supoño que será o " bledo " e de aí a frase " me importa un bledo " co valor de " non me importa nada ".
E isto foi vendima 2007 capítulo primeiro que aínda quedan as brancas por vendimar.
Etiquetas: arbo, natureza I
enviado por paideleo @ 10:35 p.m.
12 comentarios:
Importame un beldro, que medre ahí, je je. Cando estea o mosto avisa.
Que mosto,pasa unha cunca que asi desencanchámonos do ging tonic mais facilmente.Apertas
Que recordos me trouxo este post por deus, o bosque onde foi parar esta fada branca non é tan verde como desexaría.
Tedes sorte de ir á vendima. En Santiso este ano, como di miña avoa, "non hai pa que mirar". Non sei se lles deu a peste, como din os vellos, ou se xa naceron atravesadas, pero non vai haber recolleita.
A miña vendima esta a punto. Na casa xa non temos cepas tintas, haberá que facer viño blanco.
A esa planta, ou a unha parecida, aquí chamamoslle berro. No sei a min gustame facer ensalada con ela pero miña aboa di que non vale para nada que é unha herba que medra nos regueiros ela soa.
Nunca participei na vendimia, nin vin vendimiar.Pero fai anos teño tomado Mencía, creo que era da comarca de Valdeorras, é que era Joaquin Rebolledo, gardo gratos recordos dese viño e da persoa ca que compartín esa botella.
Saúdos
Sempre aprendemos contigo un montón Paideleo, a ver cando nos contas isto tomando un bo viño...
Apretas para os tres
Pola miña terra hai una planta parecida que se lle chama pamplina (o mellor é a mesma). Eu teñoa comido en ensalada cando era pequeno e recordo que me sabía bastante ben.
Saudos.
Pero e logho já começarom as vindimas em Arbo? Pensava que até a semana próxima inda nom... Será que na tua família sodes uns adiantados ou eu que ando na pola? :P
[Ser, é-che bem bonito, é a minha época favorita do ano]
pois aquí emprégase moitísimo e, cando menos eu, non tiña nin idea de onde viña a palabra. Coma sempre, graciñas!
Só fun unha vez vendimar e aínda me doen os cadrís. Pero paseino moi ben.
Pois quedo sen saber se é berro ou bledo.
Graciñas a todol polas vosas palabras e louvanzas.
Publicar un comentario
És humano ti ?
Subscribirse a Publicar comentarios [Atom]
<< Inicio