Nonaxésimo primeiro mes ( e mais catro días )

 

 

Xela medra e medran as súas habilidades. Empeza a tocar a guitarra, cambiou de escola de xadrez pero segue. Agora aprende linguaxe de signos e segue indo a ioga. Bueno, que fai de todo e non se queixa.

A semana pasada tivo unha festa de pixamas cos amiguiños e estiveron de leria ata as cinco da mañá !. Tamén Leo tivo a súa festa esta víspera e remataron ás cinco da mañá para escándalo da veciña.

Volvendo a Xela, ela segue sen comer muito pero activa cen por cen co seu patinete polo salón adiante e debuxando cada vez millor.

Entre arcos de tronos e Xela no octoséximo noveno mes ( e mais un día )

Nestes días de chuvias e bataghadas, fríos e arcos de tronos o avance na " restauración " da casa vai despacio.
Mentres; a empresa veciña retira a grúa e multiplícanse as opcións para comer co Pinchorriño e a castañada da asociación.

E que podo dicir de Xela neste mesario ?.
Pois que Xela practica coa guitarra. Tamén coas cancións que vai cantar no prendido das luces de Vilaguindastre. Millora no xadrez e vénceme. Prefire multiplicar antes que escribir e iso que ten unha letra bonita e aprende o que significa tatelo. Come algo millor porque a cambiaron de mesa e fixo un trato coa " cociñora " como dicía Leo de pequeno.
Deixo unha foto un chisco modificada.

Atención ao cliente

Mentres o pintor traballa toca seguir con papeleos e cambios. Tocou cambio de titular de compañía eléctrica e optei pola atención en galego. Primeiro houbo unha mensaxe pregrabada cunha voz de muller con todos os " e " abertos. Nas tres chamadas que fixen falei con dous homes e unha muller. O primeiro falaba un galego simple, o segundo xa soaba máis natural e do centro de Galicia e a muller tivo un desliz e falou en castelán un momento. Todo foi ben e rápido que en español tardarían máis.
Pola súa banda, a profe de Xela puxo un vídeo que falaba do holocausto e fames e outras desgrazas. Algúns compañeiros choraron e non é de extrañar que non é algo adecuado para eles.

Octoséximo oitavo mes ( e mais tres días )

Despisteime do mesario da xoubiña por tres días pero é que andamos enleados ultimamente. Xela está ben e segue sen comer muito. Tanto é así que o outro día cando comeu todo no comedor do cole levou un aplauso dos compañeiros. Nas actividades vai cumplindo e leva ben guitarra, ioga e ping pong pero quere deixar xadrez porque lle falta un compañeiriño. Segue argallando historias e xoga con todo pero non sai lectora coma Leo que por aí non se lle dá.
Na foto Xela está na casa nova con cousas que topou.
E si; repetimos o traballiño que fixemos hai oito anos.

Octoséximo sétimo mes

Xela nestes días está na súa salsa. Estamos en festas e quere montar nos coches de choque, no WipeOut e outras trangalladas como xogar ao xoquei de aire, comer churros de chocolate, piar por pistolas de pompas ou pescar parrulos como fai na foto. Dábanlle de premio xogos de maquillaxe ou monecas pero ela quere un xoguete para nenos e colleu un Talking Tom.
Conduce mui ben nos coches de choque e pega chimpos incribles no WipeOut e iso que segue a alimentarse de aire.
Nela miro o éxito da especie humana que con apenas comida pode facer de todo.
E así andamos !.

Collendo xeito

Xela empezou o cole e gústalle a profe a pesares de ser loira que non lle gostan as loiras, non sei por que motivo. Tamén reenganchou ioga que o abandoara o ano pasado e comezou a tocar a guitarra.
Por outra banda Leo onte xogou uns minutos co Ribadelouro e con iso está contento.
Todo vai collendo xeito e non o escrito do cartaz que fotografei que ten unha mistura española-portuguesa-galega que non dá confianza nesa empresa de viaxes.

Rexurdir do lume

Non colleron a Leo no equipo de Pontellas. Sobraban nenos e Leo, T. S e P. chegaron os últimos e tiveron que buscar outro equipo. Agora adestran no Ribadelouro e van xogar amistosos porque non son suficientes nenos e hai que misturar categorias. A Leo gustoulle o adestramento e iso é o que importa.
Xela empeza o cole dentro dunhas horas e a ver que tal.
Tamén caíron as Torres Xemelgas hai dezasete anos xa ! e rexurdiu algo no lugar delas.
E en Vilaguindastre celebrouse o aniversario cun novo incendio nunha clasificadora de refugallos e xa vai o terceiro.
Pero hai que ser positivos como a parella da foto.

Octoséximo sexto mes

Xela sai na foto atenta a unha tablet e é o que teñen estas novas xeracións que veñen atraídos por todos os aparellos electrónicos.
Xa lle mercamos os libros do cole e ela non quere saber de ler pero terá que pasar polo aro.
Do resto ségueche igualiña a nena: pouco come, é cariñosa e con personalidade ao mesmo tempo e activa cando quere, cando non se lle dá por dicir que lle doi algo. Tamén está mui apegada a Naideleo e chama por ela cando sente unha porta que se abre.
Seguirei contando a evolución da xoubiña.

Octoséximo quinto mes

A xoubiña está no seu ambiente na praia. Báñase a pesar de algas e peixes, mergúllase e pasa entre as pernas abertas, refresca á familia póndose enriba e na area argalla antenas wifi, trampas para peixes ou paraísos para formigas. Tamén xoga coas paletas ou cunha nena veciña de toalla á petanca, facer castelos ou repartir cunchas.
Todo vai ben.

Sétimo ano ( e mais un día )

E a xoubiña fixo os sete anos e ganas que tiña xa que contaba os días e as horas !.
Xa recibiu algúns regalos da familia: para pintar, para mergullarse, para xogar ao béisbol, para lanzar polo aire e máis.
Na foto está diante da fogueira de San Xoán en Vilaguindastre que semellaba adicada a ela. Muito correu ao redor dela debaixo da auga que botaba a mangueira de protección civil.
No cole tivo boas notas ( como Leo tamén ) e xa están de vacacións.

Octoséximo terceiro mes ( e mais un día )

A xoubiña vai camiño do sétimo aniversario anque non sabemos se vai celebralo cos amiguiños porque está un chisco rabuda. O malo é que ten a man lixeira e xa lle zoscou a dous amigos. A ver se controla ese carácter.
Cando estivo castigada sen tele nin aparellos electrónicos adicouse a ler libros do récord Guinness e nunca leu tanto. Préstanlle as curiosidades e así se enfrascou cos libros eses.
Por outra banda o Leíño chegou do cruceiro e chegou contento e contando historias do barco e da xente. Semella que ata medrou, colleu máis responsabilidade e que lle mudou a voz.
Médrannos os fillos.

Octoséximo segundo mes ( e mais catro días )

Estou na verza !. Pasan os días e non me decato do mesario da xoubiña.
Pois nada. Aí che está a nena sen os tres dentes que lle caíron estes días. O que pasa é que non lle chistou o que lle trouxo o Ratiño Pérez e quería escribirlle unha carta e dicirlle que non lle deixaba máis dentes se nin lle deixaba o que quería ela.
Polo restante vai todo ben. Agora descansou do cubo Rubik e anda cun "Beyblade " deses chamado Anubion. Tamén debuxa e mándanos debuxos a todos nuns sobres feitos por ela cun folio reciclado e grampas.
Fala coa xente e o outro día ao rematar a obra de Tío Miseria por Fantoches Baj o dos monicreques preguntou a todos os nenos se sabían que era San Pedro e Xela dixo que non que non ía a clase de relixión.
E a conta segue.

Xela a fanarse

 

 

Xela está a perder os sachos de arriba. Xa lle caiu un e o outro abanea. Na parte de abaixo un cairo é o que tembelica no sitio e así está a nena a pouco comer e sen pechar a boca.
Agora está argallando todo o día co cubo Rubik que prefíreo a mirar a Tablet. Tamén debuxa as súas persoas con roupa floreada e nubes e montañas con virandelos ou muiños de vento e bandeiras. Pon a bandeira estadounidense e pregúntolle que bandeira é esa e dime " Barras y estrellas ".
En fin, estamos colonizados.

Octoxésimo primeiro mes ( e mais un día )

Despisteime e xa non escribía sobre Xela. Como agora está na casa dun amigo nunha festa de pixama xa non me lembraba dela.
Que podo dicir ?. No cole saca boas notas, en música tamén están contentos co ela ( o día do pai fun a clase co ela e púxome un regular porque seica lle copiei unha ficha ). En inglés vai ben e xadrez tamén o colleu con gusto...ata quere ensinar a xogar aos que non saben !. Segue sendo activa e creativa e debuxa elefantes ou escribe minilibros coa súa boa letra. Gústalle que lle lea contos e agora está con Pupi e outro de adiviñas.
En definitiva: todo ben.

Octoxésimo mes

A Xela artista chegou a este mesario cun carraspeo na gorxa que xa lle dura tres semanas. Segue activa e de baixo consumo co seu leite con cereais que lle vale para almorzar e cear. E as análises médicas dan todo correcto !.
Segue co xadrez, música e o inglés pero a piscina tena abandoada polo asunto da gorxa. Dálle á chencha e mándanos debuxar e puntúa os nosos debuxos. A úktima foi que nos preparou unha cita como se citase eu a Naideleo e tiven que darlle un bico. Ela púxose contenta e preguntounos se fora unha boa idea ou non e, claro, dixemos que si.
Argalladas que cisma.
A foto é de hoxe e case de sorpresa.

Case pechados

O principio da semana estivemos case pechados na casa por mor do Leíño. Estivo pachucho con febres, dores de cabeza e cagarría. Xa o xoves e hoxe estivo ben e de feito o mércores xa chinchaba a Xela. A nena tiña un robot-cofre e tiña un contrasinal e, de tanto fozar, pecharon a portiña e Xela non era capaz de abrila. O pior é que tiña dentro cousas importantes coma un monequiño e un cochiño e algo " importantíiiiisimo " que non lembraba que era. Nese momento botamos a rir todos.
Que todo sexan anécdotas !.

Paz e lúa

Pasou o día da paz e Xela quedou desgustada porque non votan por ela no cole para o nobel da paz. Pero logo esquece os problemas e trata de agarra ra superlúa entre as súas mans. E lembramos a canción "Eu quero a lúa".

Septuaxésimo noveno mes ( e mais tres días )

 

 

A xoubiña vaise formando ós poucos e reafirmando gustos. Xa non lle gusta o taekwondo nin o ioga e agora encántalle a piscina porque mergulla a cara. Tamén probou xadrez e semella que vai seguir. Outra actividade que comezou sen afán e que agora lle presta é a música.

Quere saber de todo como capitais do mundo ou receitas de comida ( anque non coma ) e pregunta sobre a vida e a morte, os divorcios ou antepasados.

O barco segue o seu rumbo.

Cabalgata 2018

 

Pois houbo sorte e despois de botar a chover todo o tempo dende o día de Nadal, onte deixou de chover.

Saiu a cablagata ás seis en punto e a toda velocidade. A policía local cortaba o tráfico e despregaba toda a parafernalia cos dous cabalos supoño que alugados e os " recollepedros " ao rabo deles.
 

O Leíño repartía caramelos dende a carroza de Melchor. El e os compañeiriños repartiron tantos caramelos que quedaron sen apañar muitos deles.

A carroza de Baltasar tamén está adornada polo colexio de Leo e o rei saudou a Xela.

Ao principio da cabalgata ía a rondalla de Pontellas e pechando a cabalgata ían uns animadores mui vistosos.
Xela ía ir camiñando con Naideleo pero como leva unha tempada sen comer está débil e quedou de público comigo.
Levou un par de caramelazos que a fixeron chorar pero despois seguiu apañando caramelos.

E o día de hoxe viñeron os Reis e deixaron agasallos para todos que ben os merecemos.

Bo Nadal e septuaxésimo oitavo mes de Xela !

Vai rematando este decembro con todo o que supón.
No choio xa tivemos o xantar que vai a menos pero sen queixa. Tamén mudou a cesta pero só no cambio de polvoróns que agora é un panetone.
No cole os nenos remataron con boas notas e deixan ás personaxes máxicas do Nadal contentas. O festival estivo ben anque non mirei a actuación en directo de Xela.
Por certo, Xela estase portando mui ben anque ten que controlar o seu ego un chisco.
Polo resto todo vai ben.
Espero que pases unha boa noite !.